અમે તો ક્યારના ડૂબી ગયા તો આ તારે છે શું?
અમારી નાવ છે કે લાશ છે, આ આખરે છે શું?
વસાવ્યો છે અમે સૂરજ દિવસ ને રાત આંખોમાં,
છતાંયે આ સિતારા જેવું આંખોથી ખરે છે શું?
પથારીથી નથી ઊઠતો કડી મારો ય પડછાયો,
છતાંયે ઓરડામાં રાત આખી આ ફરે છે શું?
ફરીને ત્યાં જ આવું છું યુગોથી આમ અટકું છું,
નથી સમજાતું મુજને એજ, એના ઉંબરે છે શું?
જવા દેતું નથી એ બહાર ફરવા પ્રાણ ને મારા,
ખબર પડતી નથી કંઈ 'રાજ' અને આંતરે છે શું?